Anne Morrell Robinson Eli’sajik Pajjoq Kingrossk
Anne Morrell Robinson wikit Big Intervale, Unama’kik, piamiw nesiskekipunqekl eliajik pajjoq. Wel-nenut wjit teli-nta’-lukwej aq kaqi’sk kespu’tuet wjit koqoey kisitoq. Anne kisiajik pajjoq wjit ne’aqa’taqnn aq elp wjit wenik wikual. Kesatk wesku’tk teliuj pajjoq aq kaqi peykwi-ala’sit al-kina’muet. Anne eltoql amaltaqwikasikl wjit wi’katikn aq ekina’muej. Tetuji nta’-lukwet jel eymu’tijik wetnapukwala’titl aq kesiktantasik ta’n koqoey kisitoq. Anne aknutmuksiekip wjit wtlukwaqn naji-ankamkitjek Apuknajit, 2009ek.
E'pit mu kaqi lukwek. Anne Morrell Robinson
Christie: Tali-pkisinu’sip Unama’kik?
Anne: Peji-mittukwalkip njiknam wikit tett. Mu welte’tmukip matntimk Vietnam. Musike’kip nekmowey na’sik me’ ki’kajiw ketu’ l’kimup na’tami metu’kaqnik. Kisita’sip juku’en Kanata.
Ntlpa’tmaq aq nespiw amskweseweyaq nji’nmumaq, Garryo’q kisita’sip jukwa’tinen naji mittukwalanen wjit nipialasutmamk. Tetuji wlqatmekip kisita’siekip apaja’tinen kaqi-kina’masij. Mesnmekip lukwaqn klaptmnen Michael Rossevelt wi’kk. Wenjikuo’mji’j kisituekip ewe’wmek tu’sati’j aq apaja’tuekip ika’taquemk. Ta’n tujiw ankite’tm, wi’kue’k mita mna’q kejituasnl Mi’kma’ki kisna Unama’kik. Mu ekina’masultiwekip wjit Saqamawewa’ki’l Kanata.
Pejiwsiekip Garry kaqi-kina’masijek. Pekisinekip nipialasutmamk tujiw kaqi-kina’masip siwkw. 1946ewey nutapaqninen pitkmatmekip nutmo’taqninen aq wejkiwsie’kip pasik $700 ala’tuekip. Mawi amskwes pekisinekip 1971ek. Etuk 1972ek pejiwsiekip. Na’tamiaw tapuipunqekl wikiekip Wiaqajk tujiw eliwsiekip Big Intervale, Amish kisi-weskwijinujek 1974ek.
Pjila'si Kingross!
Anne Morrell Robinson; The C@P Society of Cape Breton.
Weskunkitipnik waisisk wikie’k Wiaqajk, na pasik so’qiwsulkitipnik. Me’ ajelkik wessua’likitipnik.
Te’sipow poqji-ankweyaqntipnik aq wenjitia’muk, jijklue’wjik, apitapekiejitk aq ki’kli’kwejk. Msit koqoey pasik mu te’pljik mita puksi wsimkultipnik,
Apuknajitewey narwek Big Interval. Anne Morrell Robinson; The C@P Society of Cape Breton County.
Christie: Tal-pkije’kek pema’tuo’q ika’taqneyek?
Anne: Netui’sketuapnaq weskwietaq wenjitia’maq ke’sk mna’q Amish eliekek espi-kina’matnewey, na’tamiaw 16 kisna 17 te’sipunqekl. Wetnu’kwalsiap siawa’tun Garry kisi-npikek na’sik mijua’ji’jk naji-kina’masulti’tijek awsami mtue’kip. Mu kisa’tuk te’sik wen newtukwa’lukwet.
Christie: Net tujiw poqji’sipnik pajjoq?
Anne: E’e. Aq menaqaj ankite’tmanek ajawtik pkwatutes eli’sikik pajjoq aq kisikwenk wenjitia’muk. Wenjitia’m newtipunqek maliamt pekwatu’n $600, pajjoq tel-pkji’k ne’sijik tepknusetk aq kisankuatis wjit $600 toqo naqamasiejik eliuj.
Christie: Tale’kek mawi amskwes poqji’sipnik pajjoq?
Anne: Newtipunqek ke’sk mna’q pejiwsiwe’k.
Christie: Wetakutmn teliuj pajjoq?
Anne: E’e. Pitu’nukmijaq i’liasni’k pajjoqi’k, ala’likik jel. Pukwelki’k kisiasni’k. Nkij na’sik netuiskesni’k maw wlpultite’wki’k 1950’sek na’sik tekle’jitki’k keleywasni’k tujiw iknmuipni’k ni’n. Mu nenmukip aknutmaqn wjit pajjoq, na’sik ta’n tujiw we’jitue’k wisun aq tele’k ewikasik, na kjijiatesnen ta’n wen kisiatl.
Wi’kua’sikip kejikawe’l. Elieyap misekn attelmap. na nemitu kesi-wlaptm misekn teltaqte’maq nkutey sa’qewe’kl miseknkl, na pekwatelman. Ta’n tujiw iloqamkik sa’qewe’k pajjoq ala’likik, newte’ teli-ankamkuk misekn ewekasik. Pekwatelmasnek miseknek teltaqte’maqek nkutey sa’qewey wesko’tm.
Kaqi-kina’masianek aq me’ wikianek Pennsylvania, etl-lukweyap etlikwenuj te’sipowk. Na’ tal-lukwen wela’kwl eli’sikik pajjoq. Newtikiskik attikna’timk kwijmuk. Na weljewiaq amal-lukwemk wela’kw.
Christie: Koqoey ekina’masi’sip?
Anne: Ekina’masiapnik te’sipowk teli-ankweyuj aq tel-maliamuj. Aq elp ekina’masiap na’talukwemk.
Christie: Weloqlukwe’sip?
Anne: E’e, atel poqji’saweyanek mita na’kwek maliamujik mijua’ji’jk aq elukwemk. Na’sik kesik ajelk kisi’smap. Mesnmanek tepkistek etl-lukwemk na poqji’saweyap. Poqji-lukweyanek etli’saweyap ta’n etli-npamk app ala’tuap ala’ eli’sawemkewey (elu’kwatk eli’sawemkewey) ika’tuap kikjuk tuopiti-iktuk mita mu ala’tuekip wasoqa’tekemkewey atel pejiwsie’k. Nkijaq kistelmuip. Wejiaq Princeton. Na ewe’wmap mi’soqo mesnmanek mulinji’ja’sik. Etl-lukweyap kikjuk tuopiti aq ala’tuapnek nasmisko’tasikek naste’k poqtiskasik. Kisi-nisa’tumk tujiw app masqwa’tumk wela’kw.
Christie: Net na’te’l etl-lukwe’sip?
Ta'n eykasin wjit lukeuaqn.
Anne Morrell Robinson; The C@P Society of Cape Breton.
Anne: E’e aq elp ala’tuapnek sa’qeweyek kisi-mawanqa’tumkek etli-ilekisawemkeweyek. I’ke’kwa’tuapnek npo’qn-iktuk, na’sik Garry kesnukwajek entuap ta’n etl-lukwey. Ila’sikek na ankui’kaye’k.
Ula wenjikuo’m i’ ankui’kasik, mawi amskwes ankui’kaye’k eltuekip tepkistek etl-lukwemk. Ala’tuekipnek mulinek na tema’kittuekipn sasqe’l aq tuopiti’l se’k weji-mno’tasikipnl.
Christie: Eltu’sipnl nasmisko’tasikl ta’n ewe’mn.
Anne: Mawi amskwesewe’k nasmisko’tasikek – kisituipnek
Reg Hart – Ala’ etek, me’ pem-we’wm. Tujiw Joel kisitoqip ula nekmowey. Mawi-amskweseweyek wejitasikek newkl sasqe’l aq nasapaqmumkek kutputi-iktuk. Pilueyek kisi-mawanqa’tumkek-kijka’ aji-eplewte’k mita kmu’je’l ratchetl nastekl-aji nqamasiaq ewe’wmumk. Garry kisituipnek.
Anne Morrell Robinson; The C@P Society of Cape Breton.
Christie: Na poqji’sijek pajjoq, kisi’sipni’k ewe’wan kikuaq kisna ntui’sken?
Anne: Mawi amskwesewey kisi’kip wjit ninen. Na wenik poqji-luli’tijiik l’tuan wjit koqoey teliaq. Na mawi-amskwesewey kisi’kip elaqpip ntupunk piamiw metla’sipunqekl. Garry kisite’tkip ta’n telpilij, meski’kl pkesiknn kisi-mawi’smumkl newte’jk na’kwek.
(Weskewe’k) Nkutey nutkisna’tekete’w wunijink al-sesaku’ltijik.
Na’tamiaw tapuiskekipunqekl eli’kipnik naqsunk ke’sk mna’q welpit elaqpik ntupunk.
Newte’jit mawi amskwes kisi’kip na wjit Amish mijua’ji’juijek. Aq elp me’ weskunk Garry pajjoqml wukmijl kisitatipnl. Keji’jik tekenk e’pijik tlima’tiji wunijanua, “Moqo ma’ kis-we’wat, awsam wulitpamuksit”, tujiw kaqapija’latl aq tekenk teluejik, “Oqpiluk, tel-lukwet na.” Kitk ala’likitjik.
Christie: Ta’n poqji ntui’ske’sipnik kisi’jik naqsunk?
Anne: Poqji-ntui’skeyapnik me’ wikianek Wiaqajk, 1970’sek. Mawi-amskwesewe’ki’k etli-ntui’skeyapni’k Sealladh Breagh Gift Shop – Stephanie May alsutkek malsano’kuo’mek. Na weji-pqutankuway, i’ lieyapnl etl-ankuamk koqoey kisitumk etliaql Jkikam (Sipu). Klapis pasik etlankuay ta’n etl-lukweyap.
Christie: Pukwelkik mittukutite’wk pejita’snik kisna pasik wenik wejuowk tle’k?
Anne: Atel poqji-lukweyanek, moqo. Mu skimtuk wen we’jituk ta’n wiki. Kwiluaj wen pajjoql, petkimut tett. Kisna peji-ksika’t wen. Na tujiw pasik kijka’ pekwatekeyap. Na ta’n tujiw kejitma’sianek, tewa’tuap wi’katikn-iktuk. Tujiw Salmon Lodge panta’sikip. Tluek a’qatayik kisankuatm mita tewa’tuap wi’katikn-iktuk aq a’qatayik wenik pemita’tij enqita’jik attelika’tinew.
Christie: Tami tewa’tu’sip wi’katikney?
Anne: Buyers Guide of Arts & Crafts, Studies Rally aq nike’ Cape Breton Trail Map kisna Artisan’ Trail Map. Aq elp kisituapnl wi’katiknji’jl naqtman etlituknimkl aq mittukwemkewey mtmo’taqney.
Pikswatimkewey.
Anne Morrell Robinson; The C@P Society of Cape Breton.
Christie: Ne’kaw telui’tusi’sip Kingross?
Anne: Moqo, i’ we’wmap ntuisunm. Na’sik mu kis-we’wmu nasa’simk mattaqte’kemkewey-iktuk.
Christie: I’ tlui’tusi’sip Anne Comfort Morrell?
Anne: E’e teluisap Comfort ke’sk mna’q malie’wiwanek aq amskwesewey malie’wianek teluisiap Morrell. Tujiw malie’wie’k Joel teluisiap Robinson na’sik mu wen Wiaqaj mikwite’tmuk na siaw we’wmap Morrell. Nike’ awsamelkital wisunn. Ne’wt, nikana’toq wi’katikney, telimip ewi’kmumk ntuisunm nkutey ewi’kmnkek ktapekiaqn. (weskewe’k). Ta’n koqoey wjit siaw-klo’tmap wisun Comfort mita nmaqtam, Anne Morrell elt eliapnik pajjoq. Na nekm Anne B. Morrell tujiw ni’n Anne C. Morrell.
Christie: Tali-pkiji’t pajjoq? Ewi’km ta’n koqoey kisite’tmn?
Lukwagn siawiaq.
Anne Morrell Robinson; The C@P Society of Cape Breton.
Anne: Mawi-nqamasiatew kinua’tulan. Awsma poqji’k piley. Ula nekm eli’k wjit wskwijinu’k kesatmi’tij jikeywa’tij jipji’jk. Ala’tijik msit tami wsitqamu’k al-jikeywa’tijik jipji’jk. Na teli-pqoji-lukwey, tmk ewi’kikey. Ewi’kikemk, weja’tu ta’n tl-kiltew pajjoq eli’k. Nemitu’n mu nepukwamu’knuk kis-wi’km. Ula etek, mikawe’k. Weji-pqoji-lukwey mikawe’k.
Christie: Elukomi’tij wenik ta’n telamu’k a’tla’wekn ewe’wtisk ta’n tlamukwa’tisk?
Anne: Jijuaqa ta’n tlamkwa’lates. Na’sik keknue’k a’tla’wekn. Ewe’wm kelu’k mko’qapiey a’tla’wekn. Eluluksi lian pajjoq, nikan-tlimuksi ta’n telawtik ketu’ we’wmi’tij aq ta’n telkilk aq telamu’k menueke’tij. Iknmaqik ankaptmnew kisi-wasoqitestasikl kwlaman kjijitutes ta’n koqoey welaptmi’tij kisna mu welaptmi’tik. Na weji poqji-lukwey. Wjit ula pajjoq, we’jituap a’tla’wekn ewikasik wsitqamu, wltetew elqanatekewey.
Christie: Tami wettelmn a’tla’weknn?
Anne: Msit tamiaw. Ta’n etl-ankuamk pajjoq – mu pukwelknukl tett na’sik te’s poqtamka’si we’jituan. Aq elp pilue’l malsano’kuoml elieyan. I’ kina’mueyap – ala’siap ekina’muey, ketkuni ktikik pajjoqe’ka’tite’wk wikual –na l’ta’tesnen ta’n wettelika’tijik. Msit tami ta’n peykwa’si wettelikey. I’ kina’mueyap msit tami kmitkinaq. Kesatm, mu tetuji ala’siw nike’, mita tetuji attikna’siap klapis telimsi, “Ne’wt kisna ta’pu te’s tepknuset aji kina’muetes. Tetuji ala’siap jel ne’wt eymap Maryland toqo telta’si eym Pastunkewa’ki. Na teluey tepiaj.” (Weskewe’k) Na ula (elukwatkl napui’kaqnn) teltek poqji-lukwatm, nemitu’n ta’n tel-tepkiso’tu. Petkitmui’tip wi’katikn ewikasijik tapuiskeksijik jipji’j mawi-ksala’tijik aq ta’n menueke’tijik wiaqa’tasin. Kisi iko’latis pilue’k mnuekeyan. Etek tapuiska’ql jel ne’w te’sikl tetpittsaqikl. Msit jipji’jk naspultitaq. Ewi’km napui’kaqn tetpaqki’k tujiw eltu amaltaqwikasik. Ula nekmowey kiskattek pqoji’smn.
Kisi miliujik pajjoq. Ula tel-lukwey telui’tmumk weskitja’tumk, ewe’wm eli’sawemkewey mita aji-pkija’tekemk eli’sman pitn-iktuk aq ala ajawtik. Ewe’wm jitnatqa’mumkewey waiekn ta’n nasa’tu te’s pkesikn a’tlawekn. Miamuj setamk napui’katm mita elmikja’ten. Te’s pkesikn ewi’km jitnatqa’mumkewey waiekn, jitnatqa’m a’tlawekn-iktuk, ilekism aq nasa’tu. Na ula tapu’kl kiskattek eli’sasiktn, kisa’tuapnl wlaku. Te’s na’kwek kisa’tu’n newte’ kaqi’sasik kisna tapu’kl kiskaja’tu’nl li’smn sapo’nuk. Amujpa i’ sa’se’wa’lit ta’n telamuksit a’papi’j nuta’t, na aji wliaq pukwelkl kaqi kiskaja’tu’nl li’smn. Na’sik siwa’liktis eli’sawey msit tapuiskekl kiskattek. Aji wljewiaq pilu’lukwen.
Pikwelk nutaq ketleywaqn aq musiwiskamuen.
Anne Morrell Robinson; The C@P Society of Cape Breton.
Christie: Kpitn-iktuk eli’smu’sipnl atel poqji-lukwenek?
Anne: Atel poqji’kek pajjoq mu eyknukipn eli’sawemkewe’l teli’sawekl aq mu elp etenukip jitnatqamumkewey waiekn. Mawi amskwes etl-nmittuap Normaway Gift Shop ta’n Two Macs nike’ etek, na’tuen ewe’wkip eltoq kwa’taqn ewikasikl mijua’ji’jue’l ktapekianji’jl, telita’siap weltek aq amujpa ekinu’tmasi tl-lukwen. Na pekwatelmap eli’sawemkewey. Nike’ te’s newtiskekipunqekl pemiaq piley pekwatelm wjit ta’n koqoey piley nastek.
Telo’tm mawi-wlankuayanik pajjoq ta’n anawtijik kisna kesi-wlpultite’wk kisiujik pitniktuk mita mawta’tijik wenik.
Lamikomk eyk Anne etli sawet.
Anne Morrell Robinson; The C@P Society of Cape Breton.
Christie: Ta’sijik pajjoq kisi’jik?
Anne: Newtiskimtlnaqn jel newiskeksijik. Kelwi’km ta’n tel-lukwey. Ula na pajjoq nike’ pemi’k (elukwatk wasoqitestaqney wi’katikn). Wasoqitestu ta’n tujiw kaqi-nasi’sik, kwlaman elmiaq nutayan koqoey ala’tes kisi-wasoqitestasik. Tujiw app kaqi’k wasoqitestu.
Ula patawti kisi ajayjitumk na msit koqoey ejikla’tu tujiw etl wasoqitestekey. Pewjalqek etek ke’kwe’k poqtiskasik- ta’n elp weji wasoqitestekey. Awsamkilk pajjoq qapija’lan eleka’lik msaqtaqtuk tujiw ke’kwe’k weji wasoqitesmk. Meskilk naqsun eleka’lut msaqtaqtuk tujiw weskijeka’lut pajjoq aq wasoqitesmut.
Christie: Mu meskeywun netui’sken kisi’t pajjoq?
Anne: Ksin kisi’kipnaq pajjoqaq msit wen welamataq aq weji-ksipu’tueyanaq. Ji’nm pekisink, telimit, “Ula nekm menuekeyek.” Na pemtua’lajek pipanimit ta’n tle’tis, telimk “Menaqajeweywatisk na ketl?”
Christie: Msit tami epultijik pajjoq kisi’jik?
Anne: E’e, epultijik Almantiewa’ki, Switzerland, Paris aq msit tami kmitkinaq. Amskwes mawelkik pekwatelikewipnik wejita’pnik Pastunkewa’kik nike’ ajelkik wejita’jik Alberta aq British Columbia.
Lukwagn siawiaq.
Anne Morrell Robinson; The C@P Society of Cape Breton.
Christie: Ika’qsip na’kwek telimsin, “Tepiejik kisi-iknmuetuanik, poqji-ntui’skeyanik nike’?” Kisna me’ ne’kaw ala’lijik pajjoq iknmuetu’nik?”
Anne: Moqo. Siku’skewianek ewle’jiap toqo amujpa maliamkik nijink na tujiw kisita’siap ntui’sken pajjoq mita amujpa pekwateken. Mawi amskwes kisankuay newte’jit tepawtukwetis a’tla’wekn lian piluey. Na tel-lukweyap eltu mimajuaqnm.
Nkutey kejikaw wesku’tmu’kip, meskeyin netui’sken na’sik ne’wt kisi-ntui’sken ki’s poqji ankite’tmn ta’n tliatisk piley. Mu weji milesiw ta’n tel-lukwey na’sik tepiaq piskwa’q kistelmn me’ a’tla’wekn aq jijuaqa elien aji-tko’tmn pajjoqe’kemk kisna aji-kina’masin ta’n welaptm piluey tel-lukwemk. Pema’lik lukwaqn. Ekina’muey jijuaqa tett. Nikana’tu pajjoqe’kemk. Ala’tu etl-kina’masimk lakka’p-iktuk. Peji-kina’masultijik wenik tapu’kl na’kwekl.
Nanikesigik piamu pla'kit Anne kisiajik.
Anne Morrell Robinson; The C@P Society of Cape Breton.
Christie: Ta’n poqji-nastapoqa’teke’sip?
Anne: Apaja’tasikip ta’n teli-nastapoqa’tekemk, telui’tasik Cheticampey, ewe’wmumkl miseknn, welaptmap. Pemi-aji-mtua’lik pitni’sawey (tepkik) na telita’siap wljewias nastapoqa’tekemk wela’kwl. Meski’kl loopsl mu nuta’nuk ne’tapin wen. Na elieyap Deanne Fitzpatrickek, welpijik naqsunk kisiajik. Tleyawit Ktaqamkuk, nikana’toq teli-apaja’tumk nastapoqa’tasimk. Elieyanek kistelmap teliuj naqsun wjinu’kwatm. Telte’tm naniskeksijik ki’s kisi’kik, kesatm etuk!
Weljewiaq tel-lukwemk. Aji-nqasiut naqsun aq pajjoq. Ne’wt kaqi-nastapoqa’teken tetpapeka’teken, na kaqi-kisa’lit mu nuta’nuk mawi’san.
Kisi’kipnik waisisk ewikasijik. Na’tamiaw newtiska’q jel ta’pu (12) kisna newtiska’q jel na’n (15) te’sijik wije’tultijik. Etl-ne’a’likipnik Inverness Centre for the Arts ksin.
Christie: Ula net nasmiska’taqn ta’n etli’jik naqsunk?
Anne: Meskilultite’wk etli’kik na’te’l, wjit apje’ji’jultite’wk ewe’wm apje’ji’jik ke’kwa’tu nplaqnek.
Ta'n kaqi pijo'luj naqsunk.
Anne Morrell Robinson; The C@P Society of Cape Breton.
Christie: Tali-pkiji’sit Una’ma’ki’kewey pajjoq?
Anne: Amujpa ankaptites ewikasik –piamiw kaskimtlnaqn kisiajietl. Menueke’tipn Unama’kike’l pajjoql –na kisite’tmap ika’tun newkl koqoe’l weji nenmumk Unama’ki – lukwaqn aq ekwitamemk, ika’taqumk aq emittukwemkewey.
Ki’s nemi’t ktik kisi’kip wjit Cabot Trail? Etlite’tm epit etli-anko’tasik sa’qewey koqoey Grand Etangk; kisi’kip wjit wi’katiknek teluisikek “Cabot Trail in Black & White.” Mikawe’k etek Cabot Trail, tujiw kiwto’qisasikl kisna puikasik koqoey sa’q teliaqsip. Kinua’tultes maw kejikawey Unama’kikey naqsun kisi’k – pasik we’ji’k. Ula nekm weji’kip ntui’sken napui’sawemkewey, e’pijik Sipu etlia’tijl ula nekml. Na tlpisoq Cabot Traileyaq naqsunaq mu te’sik piluey koqoey pem-lukwatmuan kisi-pitni’saqpn. Ewe’wkik pajjoqq ntui’sken napui’sawemkewe’l. Aq elp etlankuayan napui’sawemkewe’l “Quilting on the Mira” etek kikjuk Sipu. Wenik pajjoqq elia’tijik milialta’jik aq pekwatelmi’tij napui’sawemkewey te’s tami eymi’tij kwlaman mikwite’taq ta’n wejita’tij. Na l’ta’tij Malapukuek, nmia’tital Unama’kikewe’l pajjoql tujiw pkwateltaq napui’sawemkewe’l. Kisi-mawteltaq ankmayiw kisna naqtmi’tijl wtuisunmual apu’ksinew te’s tepknuset, wiaqiw a’tla’wekn kisna moqo. Kejikawe’l eykipni’k Centre for Craft & Designs tapusitki’k epitki’k etl-lukwala’tipnaq wpajjoqmuaq, na ika’tu’tip nuji-klmuejuapske’kelijl wta’kwesn Mikawe’k, welaptmanek tela’tu’tij.
Christie: Tami weja’tu’n kisite’tmn koqoey? Waisisk?
Naqsunk kisitasigik wa'isisk ewikasijik.
Anne Morrell Robinson; The C@P Society of Cape Breton.
Anne: Puni-ika’taqueyanek siwqatmap, na poqji-naso’likik waisisk pajjoq-iktuk. Na’ newte’ ta’n weja’tu ankita’suaqn aq ktik na aknutmaqn. Maw-wlaptm koqoey sa’qewey. Na’tami asukom te’sipunqekl, wejieyap Maryland Aknutmaqney Mawio’mi wjit pajjoq etlitasijik Baltimore-e’plewpijik amalsasijik kisiusnik 1800ek na eymu’tiek newtikiskik iloqamkitjik. Kisite’tmap koqoey wjit tetuji wlpijik aq melkitasijik. Tela’tekek a’tla’wekn aq amalsasijik.
Na nike ni’n kisi’kik pajjoq amalsikik mita aji mlkitasitew. Kisi’kipnik wije’tultijik pajjoq ewe’wman kis-napukwatasikl sa’qewe’l a’tla’wen kwlaman tlamuksitaq nkutey sa’qewe’ki’k pajjoqki’k. Weja’tu ankita’suaqn koqoey nemitu aq sa’qewey kisitaqn aq amalikk aq koqoey na telamu’k.
Kisi’kipni’k Pastunkewa’kie’kik wikianek na’te’l. Kaqi’sk weja’tu ankita’suaqn ta’n telamu’k a’tla’wekn ewe’wm.
Christie: Telte’tm pemi-aji-pilui’jik pajjoq aq amskwes?
Pikweli'seg peakit me'j ajijpijewatisk.
Anne Morrell Robinson; The C@P Society of Cape Breton.
Anne: Poqji’kek teli’kipnik nkutey msit wen piluey teliaj-naqamasiaq eliuj, o’lpasnewpijik aq kloqoeje’k aq mawi’smumkl pesqunatek te’sikl ketmnsaqasikl. Na’sik mu kesatmu tel-lukwey nkutey wen piluey na poqji-pilui’kipnik. Poqji’kipnik napwi’kikno’sijik pajjoqq, aji weljewiaq eliuj mita aknutmaqn etek. Nike’ apajiw eli’kik o’lpasnewpijik mita mu te’sik wen nuku’ eliaqik. Etquljewiku’sek ika’luksiap mkinan tekenik kespu’tua’tijik pajjoqq, na mawitkle’jipnik epultijik o’lpasnewe’k aq pitni’sasultijik.
Etuk jel pukwelkik eykik tel-lukutijik na’sik, mu ne’a’tu’tik wtlukwaqnuew. Na elien amal-lukwasik ne’a’tumk, napwi’kikna’sijik pajjoqq ajelkik epijik.
Christie: Na kesatmn eli’j o’lpasnewpijik?
Anne: E’e mita nekmow mawi-ksiktanujik, ne’wt pasik wen piskwa’t etl-lukwey elukomitl kejikawe’l pajjoql toqo te’sijik kisi-ntui’skeyanik.
Anne nagsi walamatki'k naqunk tle'k wta'tujk.
Anne Morrell Robinson; The C@P Society of Cape Breton.
Christie: Nutqweynek aq miaw-wulkaskek te’sipowk aq ika’taqumk mu telta’siwip klapis pajjoqq liatisk.
Anne: Moqo mu ankite’tmuas, pasik skimtuk tela’sikek koqoeyek.
Christie: Katu netui’sken kesik?
Anne: Moqo. Pasik eltu ta’n kisi-lukomimk. Jijuaqa na’tuen pkisintew, nasik awisiw. Ne’wt kaqiaq “Celtic Colours”, jel mu nuku’ nuta’nuk pantenman.
Kesik Big Interval.
Anne Morrell Robinson; The C@P Society of Cape Breton.
Christie: Na mawi-ksatmn eli’sawemk?
Anne: Wetnu’kwatmap eltaqnikemk. Ala’tuapnek eltaqnikemkeweyek etekipnek piskewsianek aq elp kistelmapnek apje’jkek. Jijklue’wjik weskweyaqitipnik, na telta’siap amujpa na’tal-lukwetu jijklue’wjuapi. Na eltaqnaweyap aq eltuap waieknapi na’sik metuaptmap eltaqte’kemk.
Metua’lik mikwite’tm ta’n tel-wije’tultik koqoey. Wetnu’kwatmap macrame na’sik weniey ta’n tel-wije’tultikl kelpilasikl. Aji-ksatm koqoey elukwatm mu tetuji mtue’nuk.
Ula aknutmaqn wejiaq aknutma’tijek Anne Morrell Robinson Wikuaq Apuknajit, 2009ek aq Christie MacNeil aq Erica Shea – elukewa’tijik Work Through Timeaq. Menueken me’ kinua’taqn wjit Anne aq ta’n tel-lukwet, nasa’si aq lie: http://www.kingrossquilts.com
© CAP Society of Cape Breton County
Download a PDF version of this story. [file size = 436 KB]
© C@P Society of Cape Breton County, 2009
